Le Dit des rues de Paris : Différence entre versions

Le Dit des rues de Paris

Guillot de Paris ca 1280-1300

Ci commence le Dit des rues de Paris.
Maint dit a fait de Roys, de Conte,
Guillot de Paris en son conte ;
Les rues de Paris briement
A mis en rime, oiez comment.
La rue de la Huchete a Paris
Premiere, dont pas n'a mespris.
Asés tost trouva Sacalie
Et la Petite-Bouclerie ,
Et la Grant-Bouclerie aprés,
Et Herondale tout enprés.
En la rue Pavee alé
Ou a maint visage halé :
La rue a l' Abé Saint-Denis
Siet asés prés de Saint-Denis.
De la grant rue Saint-Germain
Des Prez, si fait rue Cauvain
Et puis la rue Saint-Andri .
Dehors mon chemin s'estendi
Jusques en la rue Poupee ,
Adonc ai ma voie adrecee.
En la rue de la Barre vins
Et en la rue a Poitevins ,
En la rue de la Serpent ,
De ce de riens ne me repent,
En la rue de la Platriere :
La maint une dame loudiere
Qui maint chapel a fait de fueille.
Par la rue de Hautefeulle ,
Ving en la rue de Champ-Petit ,
Et au desus est .i. petit,
La rue du Puon vraiement.
Je descendi tout belement
Droit a la rue de Cordeles ,
Dames i a ; le descort d'elles
Ne voudroie avoir nullement.
Je m'en alai tout simplement
D'iluecques au Palais de Termes
Ou il a celiers et citernes,
En celle rue a mainte court ;
La rue aux hoirs de Harecourt ,
La rue Pierre Sarrazin
Ou l'en essaie maint roncin
Chascun an, comment c'on le hape.
Contreval rue de le Harpe,
Ving en la rue Saint-Seuring ,
Et tant fis c'au carefour ving.
La Grant-rue trouvai briement ;
De la entrai premierement,
Trouvai la rue as Escrivains.
De cheminer ne fu pas vains
En la petite ruelete
Saint-Seurin ; mainte meschinnete
S'i louent souvent et menu,
Et font batre le trou velu
Des fesseriaus, que que nus die.
En la rue Erembourc de Brie
Alai, et en la rue o Fain ,
De cheminer ne fu pas vain :
Une femme vit batre lin.
Par la rue Saint-Mathelin ,
En l'encloistre m'en retourné,
Saint-Beneoit le bestourné,
En la rue as hoirs de Sabonnes ,
A .ij. portes belles et bonnes.
La rue a l'Abbé de Cligny
Et la rue au Seigneur d' Igny
Sont prés de la rue o Corbel .
Desus siet la rue o Ponel
Et la rue a Cordiers aprez
Qui des Jacopins siet bien prez ;
Encontre est rue Saint-Estienne .
Que Diex en sa grace nous tiengne
Que de s'amour aions mantel.
Lors descendi en Fresmantel ,
En la rue de l' Oseroie .
Ne sai comment je desvouroie
Ce conques nul jour ne voué,
Ne a Pasques ne a Noué.
En la rue de l' Ospital
Ving ; une femme i despital
Une autre femme folement,
De sa parole moult vilment.
La rue de la Chaveterie
Trouvai ; n'alai pas chiés Marie
En rue Saint-Syphorien
Ou maingnent li logipcien.
Enprés est la rue du Moine
Et la rue au Duc de Bourgoingne ;
Et la rue des Amandiers prez
Siet en une autre rue enprez
Qui a non rue de Savoie .
Guillot de Paris tint sa voie
Droit en la rue Saint-Ylaire
Ou une Dame debonnaire
Maint, c'on apele Gietedas.
Encontre est la rue Judas ,
Puis la rue du Petit-Four
C'on apelle le Petit-Four
Saint-Ylaire, et puis Clos-Burniau
Ou l'en a rosti maint bruliau ;
Et puis la rue du Noier
Ou pluseurs Dames por louier
Font souvent batre leur cartiers.
Enprez est la rue a Plastriers .
Et parmi la rue as Englais
Ving a grant feste et a grant glais.
La rue a Lavendieres tost
Trouvai ; prez d'iluec assez tost
La rue qui est belle et grant,
Sainte-Genevieve la grant,
Et la petite ruelete
Dequoi l'un des bous chiet sus l'etre.
Et l'autre bout si se raporte
Droit a la rue de la Porte
De Saint-Marcel . Par Saint-Copin,
Encontre est la rue Clopin ,
Et puis la rue Traversainne
Qui siet en haut bien loin de Sainne.
Enprez est la rue des Murs ;
De cheminer ne fut pas mus :
Jusqu'a la rue Saint-Vitor
Ne trouvai ne porc ne butor,
Mes femme qui autre conseille.
Puis truis la rue de Verseille
Et puis la rue du Bon-Puis ,
La maint la femme a i chapuis
Qui de maint hons a fait ses glais,
La rue Alixandre l'Englais
Et la rue Paveegoire ,
La bui ge de bon vin de beire,
Et la rue Saint-Nicolas
Du Chardonnai. Ne fu pas las,
En la rue de Bievre vins
Ilueques i petit m'assis.
D'iluec en la rue Perdue ,
Ma voie ne fu pas perdue.
Je m'en reving droit en la Place
Maubert , et bien trouvai la trace
D'iluec en la rue a Trois-Porte ,
Dont l'une le chemin raporte
Droit a la rue de Gallande
Ou il n'a ne forest ne lande,
Et l'autre en la rue d' Aras
Ou se nourrissent maint grant ras.
Enprés est rue de l' Escole ,
La demeure Dame Nicole.
En celle rue, ce me samble,
Vent on et fain et fuerre ensamble.
Puis la rue Saint-Julien
Qui nous gart de mauvais lien.
M'en reving en la Bucherie
Et puis en la Poissonnerie .
C'est verité que vous despont,
Les rues d'Outre-Petit-Pont
Avons nommees toutes par nom,
Guillot qui de Paris ot nom.
Quatre-vingt par conte en y a,
Certes plus ne mains n'en y a.
En la Cité isnelement
M'en ving aprés priveement.
La rue du Sablon par m'ame.
Puis rue Neuve Nostre Dame.
Enprés est la rue a Coulons ;
D'iluec ne fu pas mon cuer lons,
La ruele trouvai briement
De Saint-Christofle , et ensement
La rue du parvis bien prés
Et la rue du Cloistre aprés
Et la grant rue Saint-Christofle.
Je vi par le trelis d'un coffre,
En la rue Saint-Pere a Beus,
Oisiaus qui avoient piez beus,
Qui furent pris sus la marinne.
De la rue Sainte-Marine ,
En la rue Cocatris vins,
Ou l'en boit souvent de bons vins,
Dont maint homs souvent se varie.
La rue de la Confrarie
Nostre-Dame , et en Charoui
Bonne taverne achiez ovri.
La rue de la Pomme assez tost
Trouvai, et puis aprez tantost
Ce fu la rue as Oubloiers
-La maint Guillebert a braiés-
Marcé Palu , la Juerie
Et puis la petite Orberie
Qui en la Juerie siet.
Et me samble que l'autre chief
Descent droit en la rue a Feves
Par deça la maison o fevre.
La Kalendre et la Ganterie
Trouvai, et la grant Orberie .
Aprez, la grant Bariszerie;
Et puis aprés la Draperie
Trouvai et la Chaveterie,
Et la ruele Sainte-Crois
Ou l'en chengle souvent des cois,
La rue Gervese Lorens
Ou maintes Dames ygnorens
Y maingnent qui de leur quiterne
Enprés rue de la Lanterne.
En la rue du Marmouset
Trouvai .i. homme qui mu fet
Une muse corne bellourde.
Par la rue de la Coulombe ,
Alai droit o port Saint-Landri :
La demeure Guiart Andri.
Femmes qui vont tout le chevés
Maingnent en rue du Chevés
Saint-Landri est de l'autre part,
La rue de l' Ymage depart.
La ruele par Saint-Vincent ,
En bout de la rue descent
De Glateingni, ou bonne gent
Maingnent, et Dames o corps gent
Qui aus hommes, si com moi semblent,
Volentiers charnelment assamblent.
La rue Saint-Denis de la Chartre,
Ou pluseurs Dames en grant chartre
Ont maint vis en leur con tenu,
Comment qu'ils soient contenu.
En ving en la Peleterie ,
Mainte penne i vit esterie.
En la faute du pont m'asis.
Certes il n'a que .xxxvi.
Rues contables en Cité,
Foi que doi Benedicité.
Par deça le Grant-Pont erraument
M'en ving, sachiez bien vraiement
N'avoie alenas ne poinson.
Premiere, la rue o Poisson ,
La rue de la Saunerie
Trouvai, et Mesgneiscerie ,
L' Escole et rue Saint-Germain .
A Couroiers bien vint a main,
Tantost la rue a Lavendieres
Ou il a maintes lavendieres.
La rue a Moignes de Jenvau
Porte a a mont et porte a vau.
Emprez rue Jehan Lointier ,
La ne fu je pas trop lointier
De la rue Bertin Poree.
Sanz faire nule eschaufourree,
Ving en la rue Jehan l'Eveillier ,
La demeure Perriaus Goullier.
La rue Guillaume Poree prés
Siet, et Maleparole emprés,
Ou demeure Jehan Asselin.
Parmi le Berrin Gasselin
Et parmi la Herengerie ,
M'en ving en la Tableterie.
En la rue a Petis Soulers ,
De basenne tout fu souilliés,
D'esrer ce ne [fu] mie fortune.
Par la rue Sainte-Oportune ,
Alai en la Charonnerie ,
Et puis en la Feronnerie .
Tantost trouvai la Mancherie ,
Et puis la Cordoüanerie ,
Prez demeure Henri Bourgaie ;
La rue Baudouin Prengaie
Qui de boire n'et pas lanier.
Par la rue Raoul l'Avenier ,
Alai o siege a Descarcheeurs.
D'ileuc m'en alai tantost ciex
.i. tavernier en la viez place
A Pourciaus : bien trouvai ma trace
Guillot qui point d'eur bon n'as.
Parmi la rue a Bourdonnas ,
Ving en la rue Thibaut a dez,
Un hons trouvai enribaudez.
En la rue de Bethisi,
Entré, ne fu pas ethisi ;
Assez tost trouvai Tirechape .
N'ai garde que rue m'eschape
Que je ne sache bien nommer
Par nom, sanz nule mesnommer.
Sanz passer guichet ne postis,
En la rue o Quains de Pontis ,
Fis un chapia de violete.
La rue o Serf et Gloriete
Et la rue de l'Arbre Sel
Qui descent sus .i. biau ruissel,
Trouvai et puis Col de Bacon
Ou l'en a trafarcié maint [con].
Et puis le Fossé Saint-Germain
Trou Bernart trouvai main a main.
Part ne compaigne n'atendi,
Mon chemin aval s'estendi
Par le Saint-Esperit, de rue
Sus la riviere en la Grant Rue
Seigneur de la porte du Louvre ;
Dames y a gentes et bonnes,
De leur denrees trop sont riche.
Droitement parmi Osteriche ,
Ving en la rue Saint-Honouré.
La trouvai ge Mestre Huré,
Lés lui seant Dames polies.
Parmi la rue des poulies,
Ving en la rue Daveron ,
Il y demeure .i. gentis hon.
Par la rue Jehan Tison ,
N'avoie talent de proier,
Mes par la Crois de Tiroüer,
Ving en la rue de Neele ,
N'avoie tabour ne viele.
En la rue Raoul Menuicet
Trouvai .i. homme qui mucet
Une femme en terre et ensiet.
La rue des estuves emprés siet ;
Enprés est la rue du Four.
Lors entrai en .i. carefour,
Trouvai la rue des Escus,
.i. homs a granz ongles locus.
Demanda : "Guillot, que fes-tu ?"
Droitement de Chastiau Festu ,
M'en ving a la rue a Prouvoires
Ou il a maintes pennes vaires.
Mon cuer si a bien ferme veue.
Par la rue de la Croiz Neuve ,
Ving en la rue Raoul Roissole ,
N'avoie ne plais ne sole.
La rue de Monmatre trové.
Il est bien seu et prové,
Ma voie fut delivre et preste ;
Tout droit par la ruelle e prestre,
Ving a la pointe Saint-Huitasse.
Droit et avant sui ma trace
Jusques en la Tonnelerie ,
Ne sui pas cil qui trueve lie.
Mais par devant la halle au blé
Ou l'en a mainte foiz lobé,
M'en ving en la Poisonnerie
Des Halles, et en la Formagerie ;
Tantost trouvai la Ganterie .
A l'encontre est la Lingerie ,
La rue o Fevre siet bien prés
Et la Cossonnerie aprés.
Et por moi miex garder des Halles
Par desouz les avans des Halles,
Ving en la rue a Prescheeurs ;
La bui avec Freres Meneurs
Dont je n'ai pas chiere marie.
Puis alai en la Chanverie ;
Asez prés trouvai Maudestour
Et le carrefour de la Tour,
Ou l'en giete mainte sentence.
En la maison a dan Sequence,
Le puis le carrefour depart.
Jehan Pincheclou d'autre part
Demoura tout droit a l'encontre.
Or dirai, sanz faire lonc conte,
La petite Truanderie ,
Es rues des Halles s'alie.
La rue au Cingne , ce me samble,
Encontre Maudestour assamble
Droit a la grant Truanderie .
Et Merderiau n'obli je mie,
Ne la petite ruelete
Jehan Bingne par Saint-Cler surete.
Mon chemin ne fu pas trop rogue.
En la rue Nicolas Arode ,
Alai, et puis en Mauconseil :
Une Dame vi sus .i. seil
Qui moult se portoit noblement.
Je la saluai simplement,
Et elle moi par Saint-Loys.
Par la rue Saint-Denis ,
Ving en la rue as Oües droit.
Pris mon chemin et mon adroit
Droit en la rue Saint-Martin
Ou j'oï chanter en latin
De Nostre Dame .i. si do[us] chans.
Par la rue des Petis Chans ,
Alai droitement en Biaubourc ,
Ne chassoie chievre ne bouc.
Puis truis la rue a Jongleeurs
C'on ne me tiengne a jengleeurs.
De la rue Gieffroi l'Angevin
En la rue des estuves vin
Et en la rue Lingariere ,
La ou l'en a mainte plastriere
D'archal mise en œuvre pour voir
Pluseurs gens pour leur vie avoir.
Et puis la rue Sendebours
La Trefilliere a l'un des bous,
Et Quiquenpoit que j'ai moult chier,
La rue Auberi le Bouchier
Et puis la Conreerie aussi.
La rue Amauri de Roussi,
Encontre Troussevache chiet,
Que Diex gart qu'il ne nous meschiet,
Et la rue du Vin-le-Roy ,
Dieu grace ou n'a point de desroy.
En la Viez-Monnoie par sens,
M'en ving aussi con par asens.
Au desus d'iluec .i. petit,
Trouvai le Grand et le Petit
Marivaux , si comme il me samble,
Li uns a l'autre bien s'asamble.
Au desous siet la Hiaumerie
Et asés prés la Lormerie .
Et parmi la Basennerie ,
Ving en la rue Jehan le Conte .
La Savonnerie en mon conte
Ai mise ; par la Pierre o let ,
Ving en la rue Jehan Pain molet ;
Puis truis la rue des Arsis .
Sus un siege .i. petit m'assis
Pour ce que le repos fu bon.
Puis truis les .ij. rues Saint Bon .
Lors ving en la Buffeterie ;
Tantost trouvai la Lamperie
Et puis la rue de la Porte
Saint-Mesri . Mon chemin s'aporte
Droit en la rue a Bouvetins .
Par la rue a Chavetiers , tins
Ma voie en rue de l' Estable
Du Cloistre qui est honestable.
De saint Mesri en Baillehoe
Ou je trouvai plenté de boe,
Et une rue de renon,
Rue neuve Saint-Mesri a non.
Tantost trouvai la Court Robert
De Paris. Més par Saint-Lambert ,
Rue Pierre o lart siet prés,
Et puis la Bouclerie aprés ;
Ne la rue n'oubli ge pas
Symon le Franc . Mon petit pas
Alai vers la Porte du Temple ,
Pensis ma main de lez ma temple.
En la rue des Blans Mantiaus
Entrai, ou je vis mainte piaus
Metre en conroi et blanche et noire.
Puis truis la rue Perrenele
De Saint-Pol, la rue du Plastre
Ou maintes Dames leur emplastre
A maint compaignon ont fait batre,
Ce me samble, por eulz esbatre.
Enprés est la rue du Puis.
La rue a Singes aprés pris ;
Contreval la Bretonnerie ,
M'en ving plain de mirencolie :
Trouvai la rue des Jardins
Ou les Juys maintrent jadis.
O carrefour du Temple , vins
Ou je bui plain henap de vin
Pour ce que moult grand soif avoie.
Adonc me remis a la voie :
La rue de l' Abbeie du Bec
Helouin trouvai par abec.
M'en alai en la Verrerie ;
Tout contreval la Poterie ,
Ving o carefour Guillori .
Li un dit ho, l'autre hari,
Ne perdi pas mon essien.
La ruelete Gencien
Alai, ou maint .i. biau varlet,
Et puis la rue Audri Mallet .
Trouvai la rue du Martrai ,
En une ruele tournai
Qui de Saint-Jehan voie aporte
Encontre la rue a .ij. portes .
De la viez Tiesseranderie ,
Alai droit en l' Esculerie
Et en la rue de Chartron
Ou mainte Dame en chartre ont
Tenu maint vit, par saint Norier.
En la rue du Franc-Monrier ,
Alai, et Vuiez Cimetiere
Saint-Jehan meisme en cetiere.
Trouvai tost la rue du Bours
Tibout , et droit a l'un des bous,
La rue Anquetil-le-Faucheur :
La maint .i. compains tencheeur.
En la rue du Temple alai
Isnelement sanz nul delai.
En la rue au Roy-de-Sezille
Entrai. Tantost trouvai Sedile :
En la rue Renaut-le-Fevre
Maint, ou el vent et pois et feves.
En la rue de Pute-y-Muce ,
Y en entrai en la maison Luce
Qui maint en rue de tyron ;
Des Dames ymes vous diron.
La rue de l' Escouffle est prés
Et la rue des Rosiers prés,
Et la grant-rue de la Porte
Baudeer , si con se comporte.
M'en alai en rue Percié ,
Une femme vi destrecié
Pour soi pignier, qui me donna
De bon vin. Ma voie adonna
En la rue des Poulies-Saint-Pou ;
Et au desus d'iluec .i. pou
Trouvai la rue a Fauconniers
Ou l'en trueve bien por deniers
Femmes por son cors soulacier.
Parmi la rue du figuier
Et parmi la rue a Nonnains
D'Iere , vi chevaucher .ij. nains
Qui moult estoient esjoï.
Puis truis la rue de Joy
Et la rue Forgier l'Anier .
Je ving en la Mortelerie
Ou a mainte tainturerie.
La rue Emeline-Boiliaue ,
La rue Garnier desus l'yaue
Trouvai, a ce mon cuer s'atyre.
Puis la rue du Cimetire
Saint-Gervais , et par l' Ourmeciau ,
Sanz passer fosse ne ruissiau
Ne sanz passer planche ne pont,
La rue a Moines-de-Lonc-Pont
Trouvai, et rue Saint-Jehan
De Greve , ou demeure Jouan,
Un homs qui n'a pas veue saine.
Prés de la ruele de Saine ,
En la rue sus la riviere,
Trouvai une fausse estriviere.
Si m'en reving tout droit en Greve ,
Le chemin de riens ne me greve.
Tantost trouvai la Tanerie
Et puis aprés la Vanerie ,
La rue de la Coifferie ,
Et puis aprés la Tacherie
Et la rue aus Commanderesses
Ou il a maintes tencheresses
Qui ont maint homme pris o brai.
Par le Carefour de Mibrai ,
En la rue Saint-Jaque et ou porce
M'en ving, n'avoie sac ne poce.
Puis alai en la Boucherie .
La rue de l' Escorcherie
Tournai. Parmi la Triperie ,
M'en ving en la Poulaillerie
Car c'est la derreniere rue
Et si siet droit sus la Grant-Rue .
Guillot si fait a tous savoir
Que par deça Grant Pont pour voir
N'a que .ij. cent rues mains sis.
Et en la Cité .xxxvi.,
Outre Petit-Pont .iiij.xx ;
Ce sont .x. mains de .xvi.xx,
Dedenz les murs non pas dehors.
Les autres rues ai mis hors
De sa rime, puisqu'il n'ont chief.
Ci vout faire de son Dit chief
Guillot, qui a fait maint bia[x] dis.
Dit qu'il n'a que iijc et x
Rues a Paris vraiement.
Le dous Seigneur du firmament
Et sa trés douce chiere Mere
Nous deffende de mort amere.
Explicit le Dit des Rues de Paris